繼續同史友們介紹一啲有趣嘅歷史故事，喺歷史上每逢有皇帝妃子話要興建啲「行宮」、「避暑山莊」，背後最大嘅目的必然就係為咗自己享樂。之不過，如果阿史同大家講，其實康熙當年興建避暑山莊，係為咗清朝嘅軍事發展，唔知史友們又信唔信呢？
其實經歷過以吳三桂為首嘅三藩之亂之後，歷時八年嘅戰亂已經令康熙意識到八旗軍作戰能力下降，為咗維持清朝嘅國力，就必須要有啲措施作出。咁訓練八旗軍又同興建避暑山莊有咩關係呢？
其實八旗軍入關後生活就係過得太安逸，原本清軍引以自豪嘅騎兵竟然喺操練時不時有人墜馬、射箭射失，同以往嘅八旗軍有好大出入。於是，為咗可以藉機會對八旗軍作出操練，康熙就特意選址河北省承德市、內蒙古自治區交界處設置木蘭圍場，由北京到圍場路途遙遠本身就已經係一場鍛鍊。而且喺圍場進行狩獵之時，士兵仲需要戴鹿頭裝扮成鹿吸引母鹿，繼而以圍獵嘅方式訓練士兵作戰能力。
除此之外，浩浩蕩蕩嘅大軍仲可以對蒙古部落展現軍事能力，以防佢哋作亂之心。興建避暑山莊雖然係可以畀皇帝享樂，但背後嘅軍事價值反而更加大。
原圖嚟自網絡