早兩日阿史介紹過古代宮廷中對巫蠱嘅理解，而關於巫蠱呢樣嘢，所帶來嘅禍害可以好深，好似漢武帝就經歷過一場巫蠱之禍。
話說武帝好神仙又迷信，晚年因為多病更加疑神疑鬼。當時好多方士女巫經常出入宮廷，教宮人埋木偶於地下，祭祀禳災。後嚟武帝得知宮內有人因猜忌咒詛皇帝，結果大怒之下就捕殺後宮同大臣數百人。後嚟佢仲叫親信江充率領胡巫捉晒涉嫌人士。由於江充同太子劉據有隙，於是江充就誣衊話太子宮中有蠱氣，當時病倒嘅武帝信咗江充之話，太子收到風於是聽從少傅石德之計，詐稱為武帝使者以圖捕殺江充同胡巫(出身北方少數民族嘅巫者)，其母衛皇后下旨調發士卒自衛，結果就有人話太子造反，最終雙方响長安城內混戰幾天，最終太子兵敗逃走自縊身亡，衛皇后因而自殺。
事後武帝發覺原來所謂太子施巫蠱只係江充誣陷，後嚟更將江充滅族，心感後悔嘅武帝响宮中興建一座思子之宮，以寄哀思。
原圖嚟自網絡