要面對自己國家嘅黑歷史，為先輩犯過嘅錯道歉並唔係容易嘅事，但近日荷蘭首相就喺海牙國家檔案局發表演說，代表荷蘭政府正式為荷蘭過去二百五十年奴隸制歷史中扮演嘅角色道歉。
據呢位荷蘭首相呂特描述，佢認為以往荷蘭嘅奴隸制係一種「違反人道罪」，而喺過去嘅大航海時代中，荷蘭就佔領過大量殖民地，包括南美小國蘇里南、加勒比海小島庫拉索、阿魯巴，以及印尼等，並且利用奴隸勞動力獲取暴利，當年荷蘭西印度公司更係跨大西洋最大販奴者。
雖然至今荷蘭海外殖民地奴隸制度已結束近一百五十年，但呢位荷蘭首相就通過英語、帕皮阿門托語以及蘇里南語重複為荷蘭過去行為道歉，唔知史友們又點睇呢？
原圖蹳自網絡