就咁聽到「福祿湯」呢個名，可能唔少史友第一時間會諗到底係啲咩美食，之不過其實呢個名背後係有一段相當血腥嘅歷史，阿史今次就同大家講一講啦！
要介紹「福祿湯」就要由明朝萬曆皇帝嘅第三子朱常洵講起。朱常洵出生於萬曆十四年，係萬曆皇帝本來最為痛愛嘅一個兒子。喺《皇明祖訓》立儲原則之下，其實萬曆皇帝就只能夠冊立王恭妃所生長子朱常洛為太子，但佢一心就想冊立朱常洵。為此萬曆皇帝被眾大臣極力反對，而佢亦都怠政以示抗議。
朱常洵最終都係無緣做皇帝，但萬曆皇帝又唔捨得佢到貧窮嘅地方受苦，於是就封咗佢去洛陽做「福王」。由於得到大量賞賜，而且做王爺基本上係冇乜工作，所以朱常洵每日就係不停吃喝玩樂，體重仲大幅增長埋。
咁同「福祿湯」又有咩關係呢？原來喺崇禎年間李自成起兵造反，當時攻破洛陽之後，就活捉朱常洵，將朱常洵剝光塗上配料加上幾隻梅花鹿一齊施以「烹刑」，「福祿湯」就係咁樣嚟喇！由於受此刑嘅人都會因為內臟被嚴重燙傷而死，所以朱常洵係死得相當痛苦。
原圖嚟自網絡