隨住電影《滿江紅》嘅爆紅，唔少同電影相關嘅事物、歷史背景以及岳飛廟都相繼成為打卡嘅熱點。雖然喺內地就有幾間位於唔同省份嘅岳飛廟，但就只有河南湯陰岳飛紀念館先有岳飛存世唯一手書遺物，阿史今次就同大家講一講啦！
湯陰係岳飛出生地，岳飛紀念館正正就係位於湯陰縣岳廟街，係當地民眾喺岳飛過世後為紀念呢位民族英雄而興建，經過幾次加建先成為今時今日嘅古建築群。
喺河南湯陰岳飛紀念館當中，就存放住岳飛存世唯一一件遺物，就係岳飛手書謝朓詩《暫使下都夜發新林至京邑贈西府同僚》。呢份手書遺物就長達15米、寬36厘米，由題跋中記述，呢件作品係出自於曾重用岳飛北伐嘅宗澤後人，當中就有記載「武穆公翰墨寶貴於世，尚矣！是捲為留守宗公秘枕之寶，迄今子孫凡一十八傳，而精忠遺跡猶然照人耳目，過此以往，當與公之聲名並垂不朽矣。」
亦都係因為岳飛嘅精神自古就流傳，所以喺呢份手書遺物上唔單止有明正德皇帝朱厚照御筆卷首「岳武穆真跡」，上面仲有前人印章12枚以及徐達、海瑞、吳大澂、許乃釗等50幾人嘅鈐印、題跋以及詩，真係相當壯觀！
原圖嚟自網絡