今日係正月十五，係元宵佳節嘅重要日子，喺呢一日我哋傳統上嚟講就會食湯圓、賞花燈同埋猜燈謎。之不過，唔知史友們又有冇諗過，到底點解冇啦啦會有一個咁樣嘅日子呢？阿史今次就同大家講一講啦！
作為農曆新年過後第一個「月圓」嘅日子，古人係相當重視嘅，而關於呢個日子嘅起源，其實大家都可能未必聽得太多，今次阿史就同大家介紹一個關於誤闖凡間嘅鳥嘅故事啦！
相傳呢個節日嘅起源係源於一隻神鳥，相傳天帝就有一隻相當寵愛嘅神鳥，之不過呢隻鍾意飛翔嘅神鳥就因為體力不支而唔小心誤闖凡間，由於佢嘅外型實在太靚，於是見到佢嘅獵人就想據為已有，但最後就唔小心殺死咗神鳥。得知呢個消息後，天帝就大怒並且決定要喺人間降下火災，燒死所有人類。
天帝嘅女兒心地善良，自然就唔想人間嘅百姓受苦，於是佢就下凡散佈呢個消息，而人間嘅百姓就諗到喺正月十四、十五、十六呢幾日每家都掛上燈籠、點爆竹以及放煙火，盡力令到人間充滿火光，令到天帝誤以為自己已經燒死人類。結果去到正月十五，當天兵一睇人間，就誤以為天帝已經放火，自此喺十四、十五、十六呢幾日掛上燈籠、放煙火嘅行為就慢慢發展成元宵節喇！
原圖嚟自網絡