之前阿史都介紹過北京嘅清華大學响香港舉行緊一個校史展覽，當中有唔少昔日大師好似梁啟超、梁思成、趙元任等嘅專題資料。講到清華大學，唔少人都覺得佢哋最強係理工科，但响八十幾九十年前，清華嘅文科一啲都唔弱，當中最傳奇嘅就一定數到清華國學研究院。
响1925年，當時嘅清華正從一所留美預備學校轉向過渡為一所真正大學，就响呢個時候，學校裡面就出現咗一個既唔屬於留美預備班、又唔屬於大學部嘅學術機構，呢個就係國學研究院。當時國學院成立目的，主要係研究古代中國經史古學，培養國學教師以及學術研究人才。至於後世人討論得最多，就一定係清華國學研究院雲集咗當時學問最好、聲望最隆嘅四位國學大師，包括梁啟超、王國維、陳寅恪同趙元任，可以話係當時代表國學研究最高水平之地。
雖然國學研究院响1929年停辦，响短短四年期間只培養七八十名學生，但後嚟呢批畢業生大部分都成為中國人文學界著名學者。所以話清華國學研究院出現時間雖短，但就充滿傳奇色彩。
原圖嚟自網絡