繼續同史友們介紹清朝歷史上嘅一啲趣聞，要知道有「萬園之園」之稱嘅圓明園係清朝嘅大型皇家園林，按照傳統清朝嘅皇帝大多數喺冬天就會喺紫禁城居住、夏天就會到承德圍獵，至於春秋季就會留喺圓明園當中聽政，處理軍政事務。之不過，同大多數帝皇都唔同，咸豐就特鍾情圓明園，一年大部分時間都會留喺呢度，甚至仲令到部分大臣上書希望佢可以留喺紫禁城多啲。到底當中有咩原因令佢咁鍾意圓明園呢？阿史今次就同大家講一講啦！
其實喺眾多清朝皇帝當中，就數咸豐同圓明園最有關係！咸豐本人就係出生喺圓明園並且喺皇子時期同其他兄弟子妹都喺呢度學習成長，度過咗相當愉快嘅童年，同時佢嘅母親亦都喺呢個園中離世，圓明園對佢嚟講都真係充滿各種回憶。或者係因為呢種特殊情感，令到佢喺春節一過就急不及待搬返去圓明園居住，直到冬至先會返到宮中。
有大臣就曾經因為咸豐長期都唔留喺宮中、生活唔自律而曾經提出奏請，結果呢位大臣就慘遭降職，自此亦都再冇人敢干預咸豐。
原圖嚟自網絡