繼續同史友們介紹我國最新嘅考古發現，陝西一直都係考古學界尋寶嘅地方，而近日西北大學、陝西省考古研究院、咸陽市文物考古研究所等單位就喺咸陽市西頭遺址進行考古發掘當中，喺三個甲字形大墓當中有重大嘅考古發現。
喺呢次考古工作當中，考古團隊就先後發掘咗南頭、魚嘴坡、尖子、上廟、斜圳五個地點，唔單止搵到仰韶、龍山、先周、西周、漢唐等各時期遺存，期間仲發掘到墓葬140座，陶窯、房址、灰溝等各類遺跡40幾個，初步判斷該城址面積約80萬平方米，就咁睇數量已經係相當豐富。
而喺其中嘅M90甲字形大墓當中，考古團隊就喺呢個墓室東西長約6.5米、南北寬約5.2米嘅大墓墓道當中，搵到排列有序殉人38具，分三層殉埋，布滿整個墓道，連計西側二層台發現5具殉人，共計43具。呢次發現唔單止係全國發現嘅西周期殉人最多嘅一個墓葬，甚至仲為涇河流域先秦時期文化序列、區域聚落形態提供相當重要嘅實物考證。
原圖嚟自網絡