喺2005年嘅一次陝西考古發掘過程中，喺一個西周墓葬群當中，考古團隊就搵到一個「芮國」貴族墓葬，當中嘅一座26號甲字型大墓甚至仲出土「七鼎六簋」嘅高等級禮制。喺周朝禮制當中，「天子下葬九鼎八簋，諸侯七鼎六簋，士大夫五鼎四簋」，換言之墓主嘅身份絕對係非同凡響。
而令到考古團隊萬萬都冇諗過嘅係，呢個墓葬嘅主人竟然係一個女子，佢就係「芮國國君夫人」仲姜。據《左傳 桓公三年》記載，「芮伯萬之母芮姜，惡芮伯之多寵人也，故逐之，出居於魏」，意思即係呢位本身係齊國人嘅夫人性格相當剛強，喺芮國國君死後，佢由於見到自己嘅兒子芮伯萬沉迷女色而唔成材，所以就將芮伯萬趕出國境逃到魏國。失去國君嘅芮國並冇就咁被秦國入侵，反而喺太后仲姜帶領之下，擊退秦國軍隊。即使後來秦國羈押咗芮伯萬，仲姜仍然係不為所動。
關於呢位奇女子嘅歷史記載並唔多，但由墓葬當中嘅禮制可以睇得出，佢絕對係成功喺2700幾年之前獨攬王權。
原圖嚟自網絡