早排就同史友們介紹過一代梟雄曹操歷史上唔少妻妾都係寡婦出身，當中佢背後就存在唔少考量，但點解三國時期嘅君主武將都會有同樣嘅愛好呢？阿史今次就同大家講一講啦！
喺古代封建社會當中，大多數嘅朝代都相當重視女子嘅貞潔，娶寡婦喺古代並唔係一種被提倡嘅行為，但偏偏喺兵荒馬亂嘅三國時期，唔單止曹操、劉備、孫權都會咁做，就連唔少武將都流行呢種做法，到底佢哋係真係因為愛情，定背後存在其他考量呢？
其實答案確實係同佢哋存在其他考量有關。先講曹操、劉備、孫權等君主，佢哋會咁做嘅原因無非都係為咗通過政治聯姻攏絡達官貴人、提升人脈版圖從而對國家帶來利處，甚至進一步將其世族納入麾下，所以曹操就曾經娶過秦宜祿老婆、何進兒媳尹氏、袁紹妻子劉氏；劉備就既娶咗孫權妹妹，又佔咗劉瑁遺孀吳氏。
君主咁做尚且背後都有考慮，但三國武將又係咪真係對寡婦情有獨鍾？其實喺當時兵荒馬亂嘅時代，人口就係相當重要嘅資源，只要寡婦再嫁後能生兒育女，基本上就冇乜太大問題，所以先至會有「娶寡婦」嘅風氣出現。
原圖嚟自網絡