對於大文豪蘇東坡，俾大家第一印象應該係創作奇才，又可能係一個美食家，又可能一個官運不濟嘅倒楣官員。其實佢官運不濟，都未必唔係無原因，包括阻人發達。
响蘇東坡做杭州做官個陣，就上奏過《乞禁商旅過外國狀》，當中就提到兩宗「走私案」。第一宗係來自泉州嘅徐戩，擅為高麗國雕造經板二千九百幾片，公然走私去高麗，仲受酬答銀三千兩，後嚟又藉著祭奠亡僧淨源為名，鼓動高麗僧團來華祭奠。由於高麗僧團來華會視為朝貢，朝廷會有賞賜，所以徐戩就可以從中得利。另一宗「走私案」就係有商客王應升等，假借往高麗國公憑，發船入大遼進行買賣，有關部門响船中發現大遼國南挺銀絲錢物，仲話係閩、浙商賈有份。
之不過，蘇東坡上奏呢兩件事就唔係因為要打擊走私，而係為咗防務。因為佢發現國內有人成日往來高麗，遂通遼國，由於高麗同遼國關係密切，因此怕有細作响國內進行危害國家安全嘅活動。真係估唔到，原來蘇東坡曾經為咗國家安全進行反走私行動。
原圖嚟自網絡