據侵華日軍南京大屠殺遇難同胞紀念館消息，南京大屠殺倖存者鄭錦陽喺周二去世，享年95歲。隨住老人家嘅離世，在冊在世幸存者僅剩42人。
提起呢位老人家，可能唔少史友都記得佢生前曾經指出過「日本人的臉比明城牆還厚」，能夠講出呢番說話，背後其實都有過一段悲劇經歷。喺南京大屠殺期間，鄭錦陽嘅曾祖母、姑父、兩個表弟、以及姨舅都被日軍殘忍殺害，佢所居住嘅祖宅更加被日軍燒毀。
雖然大屠殺過去咗幾十年，但提起呢段經歷鄭錦陽仍然相當憤慨，佢無法忘記自己嘅兩個表弟被三個日本軍人以刺刀殺死，亦無法忘記自己嘅姑媽被三個日本軍人輪姦，更加無法忘記自己嘅曾祖母喺路邊被一槍打中大腿慘死。面對咁悲慘嘅經歷，老人家難怪會對日本一直否認侵華屠殺嘅表現如此憤慨，但願老人家可以一路走好。
原圖嚟自網絡