由考古學家帶頭展開嘅考古發掘可能史友們就見唔少，但如果係由野獾進行嘅考古發掘，唔知大家又見過未呢？
近日喺西班牙就有一位居民喺經過阿斯圖里亞斯拉庫埃斯塔（La Cuesta）一個洞穴之時，就喺一個獾窩當中發現入面竟然堆滿晒硬幣。由於呢啲硬幣睇落都好似係珍貴嘅文物，所以呢位居民隨即就請嚟考古學家做鑪定，結果呢209個硬幣全部都係屬於古羅馬時代。
咁點解一個野獾窩會忽然之間有咁多硬幣呢？考古團隊就估計係因為去年西班牙一月受到一場暴風雪侵襲，野獾為咗覓食而不斷挖土，過程中就挖出咗呢個硬幣。而考古團隊就估計，呢啲硬幣應該就係公元5世紀之時，羅馬帝國喺受到入侵之時，難民喺洞穴當時收藏起身嘅。目前呢啲硬幣仲進行緊進一步清理研究，有助進一步了解當時兵荒馬亂嘅時代。
原圖嚟自網絡