繼續同史友們介紹世界各地嘅最新考古發現，近排中東地區就面臨住相當嚴重嘅乾旱問題，就好似伊拉克咁，境內規模最大嘅摩蘇爾大壩（Mosul dam）水庫水位大幅降低，無論係對人類、動物以及當地農業都帶嚟沉重嘅壓力。
水位下降對人類而言大多數情況都唔係一件好事，但今次嘅水位下降就係例外。正正就係摩蘇爾大壩水位降低，一座具有3400年歷史嘅神秘王國得以重見天日。喺水庫河床位置，就有一座係考古學家懷疑係美索不達米亞文明嘅米坦尼（Mitanni）王國宮殿現身。其實呢座宮殿並唔係第一次現身，對上一次就係2018年嘅乾旱時期，但好快宮殿又再被水淹沒，能夠研究嘅時間並唔算多。
據了解呢個古國一直都係被研究得最少嘅國家之一，喺青銅器時代開始，其實米坦尼王國就已經統治咗現今嘅伊拉克以及敘利亞北部數百年，喺西元前1500年到西元前1300年左右仲統治底埋格里斯河、幼發拉底河北部邊緣，但直到後來就被外敵西臺人、亞述人王國摧毀。而喺今次嘅發現當中，考古團隊就喺呢個城市遺跡當中發現倉庫群、工業建築、防禦城牆甚至仲有楔形文字板，真係相當豐富嘅發現！
原圖嚟自網絡