嘩嘩嘩，估唔到再次又有實證到南京大屠殺歷史嘅史料被捐贈出來！近日美籍華人魯照寧向侵華日軍南京大屠殺遇難同胞紀念館捐贈由佢搜集嘅98件（套）海外文物史料，當中唔少文物仲可以真實證明南京大屠殺歷史，阿史今次就同大家講一講啦！
呢批文物係由美籍華人魯照寧用咗多年時間搜集返嚟，當時唔單止有侵華日軍第六師團步兵第四十五聯隊步兵炮隊伍長福島正久軍人手牒，甚至手牒上仲有詳細記錄低佢曾經參加過侵佔保定、石家莊、上海、南京、廣德等戰爭，而且仲參與過南京城南地區屠殺，真係一份完整嘅罪證。歷史研究員王衛星表示，通過呢份手牒，仲可以得知日軍步兵第四十五聯隊曾經作出嘅暴行，絕對係一份相當重要嘅史料。
除此之外，魯照寧仲捐贈咗唔少英文書籍、多份畫報、報紙，例如1938年1月25日美國發行《紐約時報》頭版《混亂在南京持續》，當中就寫明「日軍佔領下的南京依然毫無秩序可言……雖然日本方面已經承諾，要把施暴的部隊調離南京，但強暴婦女以及其它的罪行仍在繼續發生」，可見日軍呢件暴行喺當時已經係為人所共知。而且喺捐贈嘅相片當中，仲有一張由美國艾克美新聞社拍攝嘅照片清晰地記錄日軍攻打南京過程。
雖然南京大屠殺距今已經過去好多年，但魯照寧就表示「我們中國人永遠不能忘記」，而佢亦都會繼續搜集相關史料，捐贈係唔會有終點。
原圖嚟自網絡