「三顧茅廬」呢個歷史典故相信史友們都聽過好多次，呢個典故就係出自諸葛亮《前出師表》中講述東漢末年劉備三次到諸葛亮住處請佢出山輔助自己，但到底呢個「三顧茅廬」嘅地點又喺係邊度呢？
近日河南南陽、湖北襄陽齊齊用到「三顧茅廬」嘅發源地作為打響當地旅遊業嘅招牌，但到底邊個地方先至真係發源地呢？喺《出師表》當中就有提到「臣本布衣，躬耕於南陽」，就咁按文字理解就應該會係河南南陽。之不過，東晉嘅史學家習鑿齒就喺《漢晉春秋》當中提出過「亮家於南陽之鄧縣，在襄陽城西二十里，號曰隆中」，所以後來先有「隆中對」嘅講法，單憑史藉嚟講，兩個地方話自己係「三顧茅廬」嘅發源地其實都有道理。
而再放眼歷史，東漢時期天下就只係得九州，而諸葛亮所在嘅就係荊州，荊州就即係如今湖北省加上湖南省以及廣州、越南北部地區嘅一個統稱；至於諸葛亮就係一直喺湖北襄陽隆中隱居，所以三顧茅廬發生地「南陽郡鄧縣隆中」亦有可能係現地名「襄陽隆中」。喺歷史上襄陽所處位置亦都經過多次改變，所以三顧茅蘆嘅爭拗，就只可以話「公說公有理、婆說婆有理」喇！
原圖嚟自網絡