繼續同史友們介紹世界各地文物最新嘅狀況，喺唔少國際級嘅大型拍賣會上，因為大家都相信拍賣嘅物品極有可能係真品，所以好多傳世嘅文物都可以賣到極高嘅價錢。之不過，近日喺美國嘅一個地方小型拍賣會上，同樣都有一件文物拍賣出一個天價！
阿史所講嘅呢件文物就係美國拍賣行William Smith Auctions所拍賣嘅一件乾隆字刻青花抱月瓶。要知道抱月瓶創燒於明代，由於器形圓滑，頸細直附帶雙耳，形似滿月，所以一直以嚟都係瓷器界經典名物。而呢次拍賣嘅抱月瓶底部更加帶有「大清乾隆年製」兩行六字款，所以如果係真品就更為珍貴。
由於呢件文物直頭冇可以參考嘅來源，所以係真係假都真係存疑，拍賣行於是就以0元開始做底價拍賣。睇到呢度可能大家都以為呢件文物未必會有太多人會冒險拍賣，但當唔少收藏家見到呢件文物之後，都願意相信呢個抱月瓶係真品，並且經過單日127口叫價之後，乾隆字刻青花抱月瓶就以價格351.5萬美元成交，折合港元約近2759萬，一夜之間成為收藏界最大焦點之一。
原圖嚟自網絡