英王查理斯三世今日就喺倫敦西敏寺舉行加冕儀式，成個加冕典禮及巡遊就喺香港時間嘅下午舉行，而呢次儀式嘅亮點除咗有之前阿史介紹過嘅260年歷史黃金馬車之外，其實今次用到嘅「加冕椅」歷史更加悠久。
喺今次嘅儀式上，英王查理斯三世就會坐上被稱為聖愛得華寶座(King Edwards Chair)、號稱係英國最古代傢俱嘅「加冕椅」。呢張椅自1309年起就成為加冕儀式上一直不變嘅器物，喺歷史上就只布亨利四世、亨利八世、查理一世、維多利亞女皇和伊利沙伯二世等26任英國君主喺呢張加冕椅上戴上皇冠。
呢張「加冕椅」據了解就係由愛德華一世於1296年委託製造，係一張高背木質扶手椅，椅子下方放置由愛德華一世從蘇格蘭帶來英格蘭嘅戰利品「斯昆石」，又稱為加冕石或「命運之石」。至於椅子起初就係貼滿金箔，嵌有彩繪玻璃，但去到16世紀嘅時候椅腳加裝咗金獅，就係今時今日咁嘅外貌喇！
雖然呢張「加冕椅」有住重大嘅歷史意義，但其實加冕椅並未被當作珍品收藏，而喺過往唔單止曾經受過一戰戰火摧殘，仲曾經因為遊客到訪而被塗鴉上「P. Abbott於1800年7月5日至6日睡在這把椅子上」字眼。自2010年起，相關部門就對加冕椅上鍍金層的清理養護工作， 加冕椅嘅狀況先至得以維護。
原圖嚟自網絡