剛才就同史友們介紹到英王查理斯三世加冕儀式上所用到嘅加冕椅歷史有幾咁悠久，而其實值得留意嘅並唔止呢樣文物，仲有南非民眾相當關注嘅皇冠權杖。
新王加冕，對於唔少曾經成為英國殖民地嘅國家民眾而言，理應係一個新開始，同時呢啲國家曾經被掠奪嘅寶物亦都應該係時候歸還，所以近日唔少南非民眾都喺網上發起請願，希望英國可以將非法得嚟嘅鑽石還返畀南非，而呢顆鑽石正正就係喺加冕皇冠、權杖之上。
喺歷史上，南非於1905年就曾經出土過一粒530克拉史上最大天然鑽石「非洲之星」(Great Star of Africa)，其後呢粒「非洲之星」鑽石就被當時英國殖民統治下嘅殖民地政府「贈送」咗畀英國王室。而喺一輪加工之下，呢粒原石就被切割分成兩部分，一部分較細嘅「第二非洲之星」就被鑲嵌於英王加冕儀式佩戴嘅「帝國皇冠」上，至於另一粒「大非洲之星」就被鑲嵌於權杖之上，所以呢兩項加冕皇冠權杖都係暗藏殖民黑歷史。
南非民眾發起嘅請願目前就有近萬人參與，大家目標都係一致，就係希望王室早日歸還非法所得嘅鑽石。
原圖嚟自網絡