近日內地就有網友發現喺一本自己買畀小朋友嘅兒童讀物當中，就出現咗一張充滿爭議嘅插圖，隨即亦都引來學者、網友駁斥歪曲甲午戰爭歷史，阿史今次就同大家講一講啦！
據了解呢本歷史讀物名為《寫給孩子看的中國史》，係由北京工業大學出版社出版，喺得知消息後就已經聯繫相關單位停止銷售並全面收回銷毀。咁到底呢本讀物出現咗咩問題呢？原來喺呢本讀物當中係加插咗一張丁汝昌投降圖喺入面。
喺甲午戰爭爆發嘅1894年9月17日，北洋水師提督丁汝昌率艦隊完成護航任務返回我國黃海海域之時，就遭遇日本聯合艦隊攻擊，爆發世界上第一次蒸汽動力戰艦大規模戰役，亦係史稱嘅「黃海海戰」。喺呢場戰役當中，丁汝昌身負重傷，至於「經遠」艦、鄧世昌指揮「致遠」全艦200餘名官兵大部份壯烈殉國，「定遠」「鎮遠」「靖遠」「來遠」四艦亦遭受重創。
面對咁樣嘅戰果，歷史上丁汝昌並冇投降，黃海海戰後仲多次向佔領咗海衛陸上炮台嘅日軍發起進攻，最終為咗避免被日軍俘獲後利用，丁汝昌下令艦隊炸沉己方軍艦，而佢自己亦喺1895年2月12日自殺殉國，係中國第一位海軍艦隊司令自殺殉國。
原圖嚟自網絡