繼續同史友們介紹全國各地一啲有趣嘅文物發現，近日喺四川通江縣就有居民向文物保護中心提供線索，表示自己喺村落入面有重要嘅發現，阿史今次就同大家講一講啦！
據瞭解，呢次提供文物線索嘅係一位當地居民，佢就表示自己喺土頂子村發現兩幅紅軍石刻標語。喺歷史上，紅十一師曾經喺1932年12月下旬跟隨紅四方面軍進入通江並先後展開鸚哥嘴阻擊戰、得勝山攻堅戰以及反三路圍等戰役，所以如果喺當地留低過標語亦都係相當合理。
而喺文物保護中心嘅考察之下，就先係喺村內嘅一塊佈滿苔蘚嘅大石上搵到刻有「加緊戒煙運動」標語嘅石刻；而另一塊石刻就係位於山林當中嘅灌木巨石上，上面就係寫住「共產黨不殺投降的官兵和團防」，兩塊大石上都有「紅十一師政治部」嘅落款。
無論由地點、內容、落款，基本上都可以肯定呢次發現就係1933年上半年紅軍嘅石刻標語，呢兩幅紅軍石刻標語亦都係過往宣傳黨內方針政策、統戰工作嘅重要見證，係相當具有歷史價值嘅文物！
原圖嚟自網絡