繼續同史友們介紹我國最新嘅考古發現，近日南京大學歷史學院就喺江蘇如皋舉行咗「徐家橋遺址考古成果發布會」，喺會上唔單止展出咗經考古出土嘅200幾件由唐代到宋代嘅文物標本，甚至仲通過與圓仁《入唐求法巡禮行記》記錄相互印證，再度實證遣唐使歷史，阿史今次就同大家講一講啦！
江蘇如皋地處長江三角洲北翼，早喺春秋以來鹽業興旺，並且被開鑿嘅古邗溝便為中國最早的鹽運河，歷史真係相當悠久。由於有過一段咁嘅歷史，江蘇省文物局就喺2015年委託考古團隊進行與唐朝時期日本遣唐使歷史及路線有關嘅考古勘探和發掘工作。
結果喺南京大學和如皋市博物館聯合通力合作下，就喺如皋徐家橋發現唐代古運河遺迹，團隊喺如皋市如城街道緊靠古運河嘅徐家橋段區域發現一處南北長約90米至120米、東西寬約200米嘅古遺址文化堆積。經過十個月時間發掘和勘探，考古團隊再通過開成四年（839年）日本遣唐使團中日本高僧圓仁喺《入唐求法巡禮行記》記載，基本上可以印證到此古運河河道正是隋煬帝時期開挖嘅「掘溝」，並且係同如東國清寺遺址共同構成南通「海上絲綢之路」嘅重要歷史遺迹。
呢次重要發現唔單止係古掘溝運河沿線首次發現嘅考古聚落，而且仲重新構建日本遣唐使如何當時首都長安、洛陽一直通過揚州，如皋、如東後，穿越東海抵達日本嘅古代國際航線，真係相當重要嘅發現！
原圖嚟自網絡