近日國家主席習近平同夫人彭麗媛响陝西西安大唐芙蓉園，為出席中國與中亞峰會嘅中亞國家元首夫婦舉行歡迎儀式同宴會。大唐芙蓉園係一座仿製過去唐代建築嘅旅遊景點，依照唐代皇家園林文化而建嘅主題公園。而响唐代，的確係曾經出現過芙蓉園。
芙蓉園又叫芙蓉苑，係昔日唐代長安一個皇家禁苑，位於曲江池南岸。响唐貞觀年間，唐太宗就曾經將佢賜俾愛子李泰，李泰去世後，唐高宗又賜東宮，到咗唐玄宗開元時期就成為御苑。雖然後世人認識芙蓉園大多數都係因為唐代，其實芙蓉園早於唐代之前已經存在。若果要追溯最早就應該係响秦代，當時响隑洲一帶開闢咗著名離宮，叫宜春苑。而响漢武帝時期因隑洲水岸曲折，形似廣陵之江，因而取名曲江。到咗隋文帝做皇帝果陣，佢覺得曲江個「曲」字唔多吉利，於是將曲江改名為芙蓉池，而附近嘅離宮就易名為芙蓉園。後來到咗唐代，芙蓉園逐漸大規模咁擴建，達至皇家園林建設嘅巔峰。
原圖嚟自網絡