繼續同史友們介紹世界各地最新嘅考古發現，相信大家都知道龐貝古城喺公元79年因維蘇威火山爆發而被掩埋，至今雖然係已經發掘出超過一千具骸骨，但絕大部分嘅人都係因為被火山灰掩葬又或者吸入太多火山氣體而導致死亡。之不過，近日龐貝古城新發現嘅兩具骸骨，就有唔同嘅死亡原因。
近日考古團隊就喺龐貝古城發現兩具男性骸骨，佢哋被發現嘅位置就係喺一個名為「純潔戀人之家」遺址。咁點解考古團隊可以咁快判斷到呢兩具骸骨唔係死於火山爆發呢？原來呢兩具骸骨被發現之時就係被壓喺一道牆壁之下，考古人員估計兩位骸骨嘅主人已經有55歲，身上出現多處骨折，並且其中一人仲曾經舉起手臂作出防衛姿態，但最終都係不幸被倒塌牆壁壓死，之後再被火山灰掩埋。
呢次發現就重新令研究人員意識到，龐貝古城喺火山爆發期間，可能同時伴隨強烈地震，而隨住考古技術嘅發達，相信未來可以更加深入了解到龐貝古城被毀滅兩天期間到底曾經發生過咩事。
原圖嚟自網絡