佛堂門天后古廟、中央會所變身法定古蹟

喺今日就有一項同本地古蹟相關嘅重磅消息，就係位於西貢佛堂門嘅天后古廟以及上環嘅前香港中華基督教青年會中央會所即將會「升呢」，由原本嘅一級歷史建築成為法定古蹟。

呢兩座歷史建築喺香港歷史上都有住重要嘅地位，位於西貢嘅佛堂門天后廟就係香港天后廟當中最古老、規模最大嘅天后廟。呢座天后廟始建於南宋時期，廟內至今仲保留咗清朝嘉慶四年所鑄嘅鐵香爐以及道光二十年所鑄造嘅銅鐘等文物，係相當重要嘅歷史見證。

至於坐落於上環必列者士街嘅中央會所就係始建於1918年，係香港中華基督教青年會嘅前總部。大樓整體以清水紅磚及混凝土建成，設計工整、簡約。有趣嘅地方係，呢所會所當年係專門用嚟畀華人聚會，大樓內嘅全港第一個室內冷暖水游泳池、全港首個懸空室內鑊形跑道更加為香港體育發展作出唔少貢獻，阿史就相當期待日後可以入到呢兩座建築參觀。