早兩日阿史都介紹咗啲中國古代葡萄酒嘅歷史，其實響古代中國嘅葡萄酒響歷朝歷代都係好受歡迎，無論皇帝、大臣官員，以至民間文人雅士都好鍾意。
講到對葡萄酒嘅鍾愛，就不得不得魏文帝曹丕。曹丕鍾意飲葡萄酒鍾意到乜嘢程度呢？響當時嘅詔書《詔群醫》中就咁寫：「中國珍果甚多，且復為說蒲萄。當其朱夏涉秋，尚有餘暑，醉酒宿醒，掩露而食。甘而不飴，酸而不脆，冷而不寒，味長汁多，除煩解渴。又釀以為酒，甘於鞠蘗，善醉而易醒。道之固已流涎咽唾，況親食之邪。他方之果，寧有匹之者。」呢個可以話係佢嘅酒評。
而響東漢末年期間，就曾經有人以酒換官，響《三國志．魏志．明帝紀》中，裴松子注引漢趙岐《三輔決錄》就有咁嘅記載：「(孟)佗又以蒲桃酒一斛遺讓，即拜涼州刺史。」蒲桃酒即係葡萄酒，孟佗（孟達之父）通過用葡萄酒賄賂皇帝身邊嘅大太監，以獲得涼州刺史一職，足見當時啲高官都好鍾意葡萄酒。
到咗唐代，唔少著名詩人嘅作品都有提及葡萄酒，最出名自然係王翰嘅《涼州詞》，「葡萄美酒夜光杯，欲飲琵琶馬上催」，可以話關於古代葡萄酒最為後人熟悉嘅詩句。至於李白作嘅詩都有提及葡萄酒，響《襄陽歌》就有「遙看漢水鴨頭綠，恰似葡萄初醱醅」，講緊都係呢種酒。
其實相關例子仲有好多，亦反映出古代葡萄酒，都真係好受歡迎。
原圖嚟自網絡