考古文物遭盜挖嘅事例喺世界各地都不斷發生，但到底呢啲被盜挖嘅文物喺流入咗海外文物市場之後，又可以點樣追討呢？近日意大利方面就有咗一宗成功嘅案例，阿史今次就同大家講一講啦！
近日意大利嘅憲兵藝術小組就宣布，經過十七年嚟嘅纏訟，曾經被盜挖嘅750件考古文物就成功喺英國古董商賽姆斯（Robin Symes）手中取回，未來就會喺羅馬聖天使城堡（Castel Sant'Angelo）國家博物館展出。據了解呢批文物最早嘅歷史可以追溯到羅馬帝國時期，唔少珍貴嘅文物就好似伊特魯里亞貴族家庭青銅三腳桌、兩件馬閱兵頭飾、兩幅陪葬畫、大理石男性半身像等等都係價值不菲，估價總值係超過1200萬歐元。
呢啲珍貴文物原本都位於意大利嘅領土之內，但就被不法之徒盜挖並且由英國交易商賽姆斯（Robin Symes）擁有嘅公司Symes走私出國。喺十七年嚟，意大利政府就多次要求賽姆斯歸還文物，但賽姆斯唔單止唔配合，而且喺英國進行破產程序、起訴返意大利政府轉頭。
結果，喺2016年一次由意大利以及瑞士展開嘅搜查行動中，就喺賽姆斯位於瑞士日內瓦自由港租用倉庫發現到1.7萬件藝術文物古董，呢啲文物好多都係由意大利當地盜墓集團Medici喺40年內盜挖。喺呢件事之後，由於賽姆斯與盜墓集團Medici關係得到證實，所以案件亦都迎來轉機，最終就由賽姆斯手上重奪文物。
原圖嚟自網絡