之前講開辛亥革命嘅刊物，今次同大家繼續研究邊個開咗辛亥革命第一槍。好多書都提到湖北新軍班長熊秉坤係打響第一槍嘅人，所以佢又有「熊一槍」嘅稱號。1911年10月10號晚，熊秉坤率先發動群眾：「與其坐以待斃，不如造反而死，死得其所也」。其後佢帶領三千幾個新兵進攻武昌，打響咗革命嘅第一槍。經過一晚激戰，呢批革命軍佔領咗武昌，湖廣總督瑞瀓狼狽逃走。之後，熊秉坤就被孫中山形容為「這就是武昌首義放第一槍的熊秉坤同志啊」，「熊一槍」呢個稱號由此而來。話說去到六十年代，末代皇帝溥儀見到熊秉坤，笑住咁講，「是你打響第一槍，才讓我變成一個普通人」。係自嘲？係幽默？定係豁達？真係得溥儀先知。

不過亦都有說法話，真正嘅第一槍係由士兵程正瀛所開，並非熊秉坤。程正瀛當時首先開槍擊中滿清排長陶啟勝，防止佢逃走，之後熊秉坤到場先連開多槍將陶啟勝射殺，驚動全營。

圖左起為鹿鍾麟（當年將溥儀逐出紫禁城之人）、溥儀同熊秉坤於六十年代合影。網絡圖片