《西遊記》大家真係熟到爛，除咗電影電視劇之外，吳承恩嘅原著亦有好多人睇過，金剛箍、三打白骨精、孫悟空三借芭蕉扇等等，無論情節定人物，真係熟悉得不能再熟悉。當中九九八十一難之一，熱到爆炸嘅火焰山，其實係咪真係存在？

《西遊記》講，火焰山係孫悟空响大鬧天宮時大腳一伸，踢冧太上老君嘅煉丹爐，跌咗落凡間所造成。唐三藏幾師徒取西經時，經過火焰山，熱到跳舞，過都過唔到，後尾由孫悟空問鐵扇公主三借芭蕉扇，先至撥熄啲火。

現實中嘅火焰山係新疆出名景點，位處吐魯番盆地，係中國最熱嘅地區之一，夏天經常飆到成60度，真係分分鐘熱到變燒豬。火焰山由紅色砂岩構成，周圍寸草不生。炎夏之時，座山响烈日照射下，升起熱氣流，望落去猶如烈火焚燒。阿史早幾年嘅8月去，專登揀朝早參觀，都熱到成40度，响「火焰山」三個字塊石前面影完相就閃人，去返有冷氣嘅地方。舊年睇新聞，話熱到成攝氏88度，搞到鐵鍋烤雞蛋勁多人幫襯，真係望到都覺得熱！