大台最近播咗套新連續劇，今次又係玩穿越時空，大概係話明末名臣左光斗同名將袁崇煥唔知做乜去咗現代。相信大家對左光斗同袁崇煥都唔會太陌生，不過响歷史上佢哋係咪相識嘅呢？


先講講左光斗同袁崇煥嘅歷史先。左光斗係明神宗萬曆年間至熹宗天啟年間嘅大臣，明末東林黨六君子之一。當時魏忠賢專權，楊漣上奏神宗，揭發魏忠賢二十四條罪狀，結果魏忠賢反誣陷東林黨六君子接受熊廷弼賄賂，最終左光斗獄中被拷打至死。至於袁崇煥，佢係明末抗金（後金或清）名將，守衛山海關同遼東，不過由於崇禎皇帝中咗皇太極嘅反間計，最後被凌遲處死。

好喇！咁响歷史上佢哋係咪相識嘅呢？佢兩個係咪相識就好似無乜記載，不過佢哋應該係同一時期做官。據《明史》記載，袁崇煥為遼東經略王在晉下屬個陣，佢响點樣設防同王在晉有分歧，於是袁崇煥越級奏請首輔葉向高。為咗呢件事，左光斗就提議搵大學士孫承宗以閣臣掌兵部事，巡視遼東，結果孫承宗經巡視後，覺得袁崇煥嘅意見可取，於是孫承宗奏明熹宗，最終佢自任督師，並重用袁崇煥。

講多少少，阿史响搵資料時見到網上左光斗係袁崇煥師父，乜....唔係史可法咩？有無史友想補充下。

圖片來源：《超時空男神》劇照