之前復活節有幾日假，阿史走咗去廣州抖兩日。所謂食在廣州，好多人去到羊城自然四處覓食。之但係，其實廣州大把同歷史有關嘅好地方，值得大家去睇。

阿史今次就去咗南越王墓行下，大家知唔知南越國係乜嘢來頭呢？南越國係秦末漢初時期响嶺南地區建立嘅國家。話說秦朝末期，各地群雄起義，有一個趙陀嘅人响南方起兵，建立咗南越國。後嚟劉邦打敗咗項羽，建立咗漢朝，但打咗咁多年仗，劉邦唔想出兵打南越，於是叫南越歸順，南越亦成為咗漢朝嘅藩屬國。不過，趙陀响南越國內仍然自稱為皇帝。據《史記。南越列傳》所載，南越國歷五世共93年（歲）亡國。

呢個南越王墓，就係趙陀個孫、第二任南越王趙眜嘅墓。呢個墓之所以俾人發現，係因為80年代本來要起樓個陣，挖挖下發現呢個墓。呢個墓巴閉之處，一來佢係嶺南地區罕有嘅漢代彩繪石室墓，二來墓內共搵到成萬件文物，當中包括「文帝行璽」金印、玉角杯、錯金銘文虎節、印花銅板模、平板玻璃銅牌飾等，呢啲都係了解二千幾年前嶺南地區非常重要嘅文物。阿史覺得最正嘅，就係絲縷玉衣。玉衣主人就係南越文帝，而絲縷玉衣係漢代帝王同貴族死個陣著嘅斂服，據講專家修復件嘢都用咗三年。此外，帝印玉印就係南越王响領地內稱帝嘅重要證明；文帝行璽就係少有嘅漢代金璽，呢啲都係無價之寶。

以前讀中史，教科書基本上都無乜提過南越國嘅歷史。估唔到一個對漢初嶺南地區歷史咁重要嘅遺址，竟然係離我哋咁近。當年曾有歷史老師同阿史講過：「少讀書多走走」，認識歷史的確唔可以淨係讀書。親身行過，感覺的確唔同啲。

圖片來源：阿史