記得有中史老師講過，响香港讀中史嘅同學仔都算係師承錢賓四先生一門，唔單止係上一輩嘅歷史老師都俾佢教過，連中史課課程都係按佢嘅著作嚟設計。不過，呢位桃李滿天下、為世人所公認嘅國學大師，原來大學都無讀過。

錢穆先生响年幼年曾响私塾學習，而後嚟去咗常州府中學堂讀到四年級，但因學校停辦而佢留响屋企自學。到咗十八歲個年佢就開始响小學教書。雖然佢當時只係小學老師，但佢對傳統文化同經籍都有所研究，1917年仲寫成第一部著作《論語文解》，而佢亦响上海《時事新報》副刊《學燈》投稿。

到咗1922年，佢收到廈門集美中學嘅聘書，原來集美中學教務長施之勉曾經讀過錢穆响《學燈》投稿文章，認為佢响學術上有獨特高明之處，所以決定聘用佢。就係咁，錢穆就由一個小學老師轉到中學任教，從1922年起八年先後受聘集美、無錫三師、蘇州省立中學。

到咗1930年，錢穆因發表《劉向歆父子年譜》成名，被顧頡剛推薦，聘為燕京大學國文講師，任教兩班國文，成為大學講師，亦係為錢穆先生任教大學之始。