近日全國人大副秘書長李飛兼香港基本法委員會主任李飛談及香港普選時，特別重提已故中國領導人鄧小平「要勇敢地面對災難，作出決策」嘅語句，李飛就認為今日面對普選問題，同樣要以最大決心和勇氣，果斷地作出歷史性抉擇。

鄧小平呢一句「勇敢地面對災難」絕對稱得上係史上金句之一。呢句話究竟點樣嚟？等阿史話你知啦。

話說鄧小平响1982年9月會見當時嘅英國首相戴卓爾夫人，雙方就香港前途作出談判，當時戴卓爾夫人擺出嘅姿態好強硬，仲揚言：「如果中國收回香港，就會給香港帶來災難性的影響。要想繼續維持香港的繁榮，就必須繼續由英國來管理她。」

嘩，鄧小平聽到呢番話後，一啲都無被嚇倒。鄧小平首先強調，中國收回香港，係全中國人民乃至全世界人民嘅意願，「如果不收回，就意味着中國政府是晚清政府，中國領導人是李鴻章！」

鄧小平跟住仲借用戴卓爾夫人嘅話作出「回敬」，佢話，中國政府各種可能性都估計過，「還考慮了我們不願意考慮的一個問題，就是如果在15年的過渡時期內香港發生嚴重的波動，怎麼辦？那時，中國政府將被迫不得不對收回的時間和方式另作考慮。如果說宣布要收回香港就像夫人說的『帶來災難性的影響』，那我們要勇敢地面對這個災難，作出決策。」

唔知戴卓爾夫人係未被鄧小平咁強硬嘅措詞嚇倒，當佢响會談結束後步出人民大會堂時即顯得心事重重，步落石階時更失足向前仆倒，成為舉世聞名嘅「世紀一跌」。之後各界多數解讀戴卓爾夫人呢一跌證明英方策略全盤失利，香港最終亦順利回歸中國。

圖片來源：網絡