香港舊年發生咗一場電視發牌風波，搞到社會議論紛紛。電視係香港一個重要嘅傳播媒體，咁大家又知唔知香港第一間電視台係邊間，同埋係幾時開業呢？

阿史翻查資料，先知道香港第一間電視台叫麗的映聲，呢間電視台其實係麗的呼聲嘅電視台。响1957年4月，港英政府向香港麗的呼聲發出執照，俾麗的喺香港獨資經營有線電視。就係咁，香港第一間電視台就喺1959年5月29日出現喇！麗的映聲唔單止係香港第一間電視台，而且仲係華人地區第一間電視台，相當架勢！

有趣嘅係，當時麗的映聲提供嘅係有線電視服務，開台個陣時每日播放2小時，月費為港幣25元，所以當時睇電視絕對係奢侈嘅事，聽講當年好多士多會裝部電視機，之後就好似小影院咁，要睇電視要俾錢，睇完一套戲或節目就要走人。由於係喺士多睇電視，所以好多觀眾都會買支汽水或飲杯涼茶，真係識做生意！

但到咗六十年代，香港第二家商營電視台電視廣播有限公司成立，即係無綫電視，對麗的映聲帶來好大衝擊。由於無綫採用無線廣播，唔駛錢都有得睇，而麗的仲係有線廣播，令麗的客戶大量流失。麗的見唔對路，係1973年12月由有線廣播轉為無線，收費廣播變做免費廣播，名稱亦由「麗的映聲」變做「麗的電視」。好可惜，雖然麗的製作唔少優質節目，培育唔少影視人才，但就無辦法挽回劣勢，1982年麗的嘅大股東賣咗盤俾商人邱德根，仲改埋名「亞洲電視」，麗的電視呢個名就成為歷史。

圖片來源：網絡