尋日係武昌起義106周年紀念嘅日子，記得响讀書時老師响課堂上就問咗一個問題：武昌起義同孫中山究竟有乜關係呢？

孫中山先生响晚清搞革命就係人都知，之但係唔少人就話武昌起義個陣佢係响美國，而武昌起義亦係一次爆炸意外而引發，好似唔多關佢事喎。要知道答案嘅話，可以响孫中山先生嘅著作《建國方略》第八章〈有志竟成〉中搵到。佢大概係話武昌起義爆發後，當時嘅湖廣總督瑞澂就同漢口嘅各國領事商議，要求佢哋幫手「開炮轟擊」。之不過，有份商議嘅法國領事羅氏同孫中山係舊交，於是就响會議上話革命黨同孫中山唔係義和拳，而係以改良政治為目的。當時俄國領事聽完之後認同法國領事嘅講法，其他領事亦同意對呢件事維持中立不加干涉。瑞澂見領事們唔幫手，結果走咗去上海，無咗話事人嘅武昌就成為革命黨人嘅天下。

按孫中山嘅講法，即係話如果唔係佢識個位法國領事，瑞澂就唔駛走，革命黨仲可能俾外國大炮射殺添！之不過，有學者就搵到資料，話孫中山先生同呢位法國領事的確係舊相識，但响佢嘅外交報告唔單止無提過呢件事，相反，武昌起義爆發後，呢位羅氏仲多次求增派軍艦，隨時準備武力干涉。咁似乎同孫中山講嘅有出入喎…