新任南韓總統文在寅上任之後，隨即重推被前兩任總統所擱置嘅「陽光政策」，加上其他周邊國家嘅壓力同聯合國史上最嚴厲嘅制裁，終於成功促使北韓領袖金正恩宣布「棄核」（真定假當然未知），兩韓政府首腦更會喺今個月底舉行峰會。睇返資料，兩韓政府首腦之前其實都舉行過峰會，第一次係喺2000年年中舉行，嗰一次會晤，仲要係韓戰後第一次南北兩韓首腦嘅正式會晤添。

講返2000年，當時兩韓首腦都唔係今日呢一個，南韓方面就係首個提出「陽光政策」嘅南韓總統金大中、至於北韓方面，當然就係金正恩個爸爸金正日。舉行地點方面，第一次兩韓首腦會晤地點係喺北韓首都平壤，新聞資料顯示，金大中抵達平壤嘅時候，受到金正日等一眾朝鮮領導人，以及60萬平壤市民歡迎。

值得一提，當日有份迎接金大中嘅北韓領導人，除咗金正日本身外，仲有現任北韓最高人民會議常任委員會委員長金永南，金永南就係早一排同金正恩個妹妹一齊去南韓平昌參加冬奧，打開兩韓對話缺口嘅關鍵人物之一，亦係今時今日北韓「名義上」嘅國家元首。

第一次兩韓首腦峰會，成果可以話非常豐碩，兩國就南北和解統一、家屬團聚等方面溝通，最終兩國達成共識，兩國一齊發表《南北共同宣言》。宣言上面列明，兩國同意通過全民族共同努力自主解決國家統一問題，包括建立鬆散式聯合政府等；另外，雙方亦同意立即解決人道主義問題，等兩韓因為韓戰而離散嘅家屬可以重聚等等。

呢一次促成兩韓首腦會晤，成功緩和朝鮮半島居勢，直接令金大中喺同年獲頒諾貝爾和平獎。喺維持和平非戰上，第一次嘅兩韓首腦峰會可以話係極之成功，不過因為各種原因，令到第二次嘅兩韓首腦峰會要推至2007年10月先再可以舉行，當年時任總統盧武鉉成功同北韓方面召開第二次首腦會晤，兩國亦簽訂咗《北南關係發展與和平繁榮宣言》。

不過，由於繼盧武鉉之後，南韓方面由「強硬派」執政，繼任嘅李明博對《南北共同宣言》持否定態度，兩韓關係又即時回到起點，最終要到十年後嘅今日，當盧武鉉相交幾十年嘅摯友文在寅執政後，兩韓關係先至再次回暖，可以喺南北韓非軍事區共同警備區內、屬於南韓轄區嘅和平之家舉行峰會。

睇完呢段歷史，阿史更加相信「辦法總比困難多」，如果所有國家同地區嘅爭議都可以「坐低傾掂」佢，戰爭就永遠唔會出現喇。