近8年前康泰菲律賓團人質事件中，有一位媽媽人急智生，展現出無私嘅母性，除咗帶子女脫離險境，仲機智咁救多一位小朋友。佢就係其中一名被挾持嘅人質——傅太。

傅太同老公仔女一家四口去旅行，載住團友嘅旅遊巴被槍手門多薩騎劫。當時香港電視直播中途，可以見到有女團友拖住三個小朋友離開旅遊巴，個女團友就係傅太。後來傅太講返案發經過，話當時槍手主動畀佢帶埋10歲囝囝同4歲囡囡離開，佢臨走前同另一名團友汪太目光相接，「汪太望住我，我又望住Jason（汪太細仔汪政逸）。」就係依一吓眼神交流，救多一條命。

槍手指住年紀小小嘅汪政逸，問傅太係咪佢個仔，傅太臨危不亂，答「唔係我個仔，係我親戚。」槍手於是叫傅太帶走三個小朋友，當時兩位媽媽再度對望。傅太其後再問政逸「跟唔跟阿姨走？」小朋友點頭後，一大三小嘅人質獲釋，死裡逃生。阿史當時睇到依單新聞，感動到喊，即使無血緣關係，即使面對生死存亡，人性光輝依然閃亮。

最終傅太嘅的丈夫不幸被槍手殺害，但傅太仍然展示出堅強一面，母兼父職與一對子女積極生活。佢仲呼籲大家唔好將悲傷化成仇恨，再令無辜嘅人受到傷害。

依位偉大母親，傅太，名叫曾懿麗。