尋日講起惠州有間蘇東坡祠，今日繼續講講惠州呢個城市。除咗蘇東坡祠外，惠州另外有一個地方亦同蘇東坡好大關係，呢個就係中國道教名山之一嘅羅浮山！

是咁的，相信大家都聽過蘇軾《惠州一絕》裡面嘅名句：「羅浮山下四時春，盧橘楊梅次第新。日啖荔枝三百顆，不辭長作嶺南人」；據講，蘇東坡真係喺羅浮山下完成創作。

除咗蘇東坡外，羅浮山之所以出名，正如劈頭所講，因為佢係中國道教十大名山之一；另外，史學家司馬遷亦將羅浮山稱為「粵岳」，所以羅浮山亦有「嶺南第一山」嘅美譽。

羅浮山喺道教嚟講，屬於十大洞天中第七洞天、七十二福地中第三十四福地。據說，葛洪、黃大仙、鮑姑、呂洞賓、何仙姑、鐵拐李等等神仙都曾喺呢處留過生活痕跡；另外，據《羅浮山志》所講，被道教視為「重視個人修煉」嘅神仙安期生亦曾喺呢度修煉，而宋代道士白玉蟾據說亦曾喺呢度傳教。

圖片：互聯網