絲綢之路同張騫有關？

自從「一帶一路」呢個政策出台之後，張騫同絲綢之路就不斷俾人提起，甚至講到佢係絲綢之路嘅開拓人咁，咁即係點呢？

張騫出使西域呢段歷史相信讀過中史科都會知道，當年漢武帝派佢去聯繫大月氏，聯合夾擊匈奴，點知去出使期間俾匈奴捉咗，張騫响匈奴被迫住咗十幾年，最後成功逃退，但去到大月氏之後，大月氏已經對打匈奴無乜興趣，最後張騫無功而還。後嚟佢再出使西域，幫漢朝同西域各國搞好關係，所以教科課就話，自張騫出使西域起，開拓咗中國與西域嘅交通孔道。

但其實，早响張騫出使西域前，通往西域嘅交通路線早就存在，有歷史學家就話早响商朝已經有中原通往西域（依家新疆）嘅交通路線。另一方面，漢朝嘅勢力範圍並未控制到中亞地區，最多只係去到今日嘅新疆一帶，可以咁講，當時「絲綢之路」呢條中西經濟文化交通孔道嘅形成，更大程度上係因為各地商人經商而形成，而唔係政治下嘅產物。所以，將張騫講到係絲綢之路嘅開拓人，可能有商榷餘地。