提起阿富汗呢個國家，史友們不其然可能會諗起戰亂。雖然阿富汗近五十年飽受戰爭摧殘，但係個國家所在嘅地區，地處中亞交通樞紐，曾受希臘、古印度、波斯、伊斯蘭等文化薰陶，境內文化寶藏豐富，巴米揚大佛就係其中之一。
巴米揚大佛位於阿富汗巴米揚山谷，呢個地方响西元一世紀至九世紀係佛門勝地。據《大唐西域記》記載，位於巴米揚嘅梵衍那國，佛教極盛，有幾千教徒響度修行。山谷到依家仲留底咗近千個佛龕窟遺址，當中佛龕窟群東西端各有一座石大佛，分別高五十三米同三十八米，呢個被後世稱為「巴米揚大佛」。呢兩個大佛建於約公元六世紀，鑿開涯壁雕刻而成，可以話係當地嘅佛教文化地標。响《大唐西域記》入面都留低咗當時玄奘法師望見大佛嘅段落：「梵衍那國……王城東北山阿有石佛立像，高百四五十尺，金色晃耀，寶飾煥爛。」
可惜嘅係，呢個地區被信奉伊斯蘭教嘅政權統治，自始兩座大佛响各時代都受到唔同程度嘅破壞。好似响十七世紀，篤信伊斯蘭教嘅蒙兀兒帝國皇帝奧朗則布就試過用大炮去毀壞大佛；响2001年，當時嘅阿富汗塔利班政權不顧國際反對，完全炸毀大佛。雖然其後國際社會積極籌劃大佛嘅修復工作，但至今進展不大，而聯合國教科文組織方面就比起重建，更加傾向保育遺址。