再談韓戰 美國將帥不和令韓戰打三年？

今日繼續講埋韓戰啲口水尾，對於點解以美國為首嘅聯合國軍隊軍備精良、戰術先進，但係對住當年相對落後嘅中國同北韓，仍然打足三年都打唔贏場韓戰，甚至最後要同中國及北韓簽署停戰協定呢？（補充一句，北韓早喺2009年已經話唔承認呢份協定）

當然，一如絕大部份歷史事件，梗係眾說紛紜啦，況且呢個世界又點會咁多「單一理由」吖！阿史個人聽過最普遍講法，就係話當時聯合國軍隊指揮官、美軍「五星上將」麥克阿瑟低估咗中國人海戰術嘅威力，就係因為咁，戰事一拖再拖，最終拖到美國國內政治壓力爆晒煲、國民反戰情緒高漲，先至被迫收手。

呢個說法當然有一定理據啦，但阿史近日同位前輩傾偈，佢就提出另一個說法：據講，當時來自美國嘅麥克阿瑟，同時任美國總統杜魯門互不信任，麥克阿瑟喺韓戰期間曾經要求杜魯門出動原子彈，但杜魯門既唔想引發第三次世界大戰，亦唔想麥克阿瑟返美國必代表共和黨選總統，所以一味用「拖字訣」，最終拖無可拖之下，正式將麥克阿瑟「炒魷」，撤去佢聯合國軍最高司令官嘅職務。