阿史早兩日轉發過條新聞，內容係指南韓方面將喺韓戰期間戰死嘅中國戰士骸骨轉交到內地官方，等呢批客死異鄉多年嘅戰士可以返到家鄉入土為安。講起韓戰，老老實實，誰是誰非有好多說法，不過有一點都幾肯定嘅，係中國喺呢次戰爭裡面損失咗極多人命，但到底實際數字有幾多，各方說法一直紛紜。

阿史睇過一啲內地資料，韓戰中國志願軍司令部曾經公布有36萬人傷亡，但到底有幾多中國戰士犧牲，當時係冇答案嘅。之後去到90年代，即係丹東建立抗美援朝戰爭紀念館嘅時候，紀念館將各省上報數字相加，得出中國犧牲戰士總數為達到17萬人，其後再修訂為18萬3千人左右。

18萬3千左右，內地方面現存嘅數字基本上都係20萬之內，不過相信唔少史友都聽過、睇過，有所謂蘇聯官方解密文件說話，中國喺韓戰時犧牲嘅人數，隨時超過100萬。寫到呢度，阿史故意唔寫其他參戰國嘅犧牲數字，因為阿史堅持一點，戰爭唔會有贏家，更加唔應該有比較！

唔理點都好，阿史反戰立場係堅定嘅。早排睇新聞，話國家主席習近平同國務院總理李克強不約而同話，中國會堅定走和平發展道路、唔會對其他國家構成威脅，亦重申「永不稱霸」等等原則，拋低政治立場，如果中國真係做得到，阿史絕對係歡迎同恩惠嘅。

圖片：互聯網