講起一啲粵式甜品，廣東順德嘅雙皮奶就相當有名。

雙皮奶相傳係由順德大良一位董婆婆係1850年代所發明，雙皮奶嘅奶皮就係當中精華所在，利用牛奶冷卻之後會凝結嘅特點而成，一碗雙皮奶有兩層奶皮，一層喺面，另一層喺底，所以先叫做雙皮奶。有人話順德嘅雙皮奶正宗啲、好食啲，估計係因為順德嘅雙皮奶係用順德嘅水牛奶去整有關，水牛奶乳脂含量高達8%，更容易凝固成奶皮，反而香港唔少餐廳都只會用普通牛奶去整，就無咁正宗。


不過咁，自從改革開放之後，順德嘅經濟產業改變，畜牧業萎縮，相信愈嚟愈難食到真正用順德水牛整嘅雙皮奶喇。