撇開政治同民族，今日同大家講講民國時期汪精衛嘅感情生活。佢後生果陣生得靚仔，有文化又有口才，係公認嘅美男子，輕易俘獲女仔嘅歡心不特止，連男人都對佢一見傾心？絕對無誇張，徐志摩曾經喺日記入面讚歎汪精衛係個「美男子，可愛」，佢仲透露：胡適話如果自己係女人一定會死心塌地咁愛上汪精衛，但就算宜家佢係男子，都愛汪精衛。胡適咁傾慕汪精衛，隨後兩人仲變成密友，惺惺相惜。不過，阿史唔係想講汪精衛嘅友情，而係想講佢同太太陳璧君。

1908年，汪精衛喺馬來亞檳城結識咗華僑巨富陳耕基，陳耕基積極支援孫中山嘅革命，經常捐錢同物資，而孫中山就會定期向陳耕基贈送《民報》等革命刊物。由於公事關係，汪精衛經常會去陳耕基屋企，因此識咗陳耕基嘅女兒陳璧君。喺汪精衛嘅一次演講入面，陳璧君被汪精衛嘅才華同風度所折服。陳璧君好中意睇《民報》，又受汪精衛等人嘅影響，於是決心以實際行動投身革命。

後嚟，陳璧君加入同盟會，去咗《民報》幫手，同汪精衛一齊工作，逐漸傾心於汪精衛。汪精衛嘅條件本身就好，加上佢嫖妓、賭博、酗酒等惡習一律唔好，當時被人稱為「道學先生」。更令陳璧君動容嘅係，汪精衛喺革命成功前堅持唔結婚，因為佢認為革命家結婚必然會陷妻子於不幸，佢唔想令自己所愛之人一生不幸。之後汪精衛同陳璧君合作籌劃刺殺清朝高官，可以話係一齊共過患難、出生入死嘅好戰友。汪精衛雖然都對陳璧君有意，但兩人始終保持住戰友關係，無越雷池一步。

後嚟汪精衛刺殺載灃失敗被判終身監禁，陳璧君據講當時送咗籃雞蛋入監倉，汪精衛食食下發現入面藏有陳璧君嘅書信，表示有意下嫁同埋願意等。汪精衛喺辛亥革命成功之後被釋放，就同陳璧君結咗婚，有情人終成眷屬。

圖為汪精衛夫婦。網上圖片