汪精衛曾暗殺清朝高官？

錯誤嘅路，好多時真係會越走越遠。對於汪精衛呢個人，近代史學家大多認為佢係漢奸，又有幾多人估到，曾經係革命黨人嘅佢，當年試圖暗殺清朝高官？

汪精衛原名汪兆銘，精衛係筆名，佢喺廣東三水出世，父親汪椒係個落第秀才，特別中意王陽明同陸游，但由於年老眼唔好，就每日都叫囝囝汪精衛朗讀王陽明嘅文章同陸游嘅詩，無形中培養咗汪精衛演講嘅口才。呢種才能後嚟成為汪精衛幫助孫中山發起革命嘅一大助力，仲識到日後嘅老婆陳璧君。

1900年義和團事件之後，汪精衛參加清政府嘅公費留學考試，被錄取去日本留學。1905年，汪精衛透過國民黨元老胡漢民堂弟嘅關係，拜訪咗孫中山並加入同盟會。之後，汪精衛做咗孫中山嘅助手，跟住佢去越南、馬來西亞等地從事革命活動。三年後，革命黨六次武裝起義相繼失敗，以梁啟超為首嘅保皇黨批評革命黨領袖係教唆人哋送死而自己坐收名利嘅「遠距離革命家」，激起一片反革命領袖嘅聲音。呢個時候，汪精衛就試圖暗殺清朝攝政王、末代皇帝溥儀生父嘅載灃，希望挽回民眾對革命黨嘅信心。不過暗殺行動最終失敗，汪精衛被捕下獄兼終身監禁，直至辛亥革命後先獲赦釋放。