汪精衛漢奸之路

上次講到民國時期，仲未成為漢奸嘅汪精衛刺殺攝政王載灃失敗，被判終身監禁，要到辛亥革命成功先被釋放。佢獲赦免之後，同馬來西亞華僑富商嘅女陳璧君結婚，仲慢慢淡出政局，去咗法國讀書。後嚟，袁世凱復辟帝制，孫中山召汪精衛回國反袁，令汪精衛又再次投入政治洪流。孫中山逝世後，無指定邊個做佢嘅傳人，喺眾多親信入面，以汪精衛嘅呼聲最高，就係咁，汪精衛做咗一段短時間嘅國民政府主席。另一邊廂，手握國民政府軍權嘅蔣介石亦迅速崛起。

1937年盧溝橋事變之後，汪精衛主張同日本講和。同年11月，日本首相近衛文麿發表《東亞新秩序》，而汪精衛就響應近衛嘅聲明，發表所謂嘅「艷電」，話支持同日本妥協。之後蔣介石嚴詞駁斥，同汪精衛決裂，而國民黨內亦同意開除汪精衛喺黨內嘅一切職務。

汪精衛1940年响南京成立由日本扶持嘅傀儡政權，參與由日本主導嘅大東亞會議。1944年11月10日，汪精衛嘅「多發性骨髓腫」舊病復發，不治身亡，葬於南京明孝陵前嘅梅花山。兩年之後，中國陸軍總司令何應欽奉命炸開汪精衛墳墓，將棺木連同屍體送往清涼山火化，並無留下骨灰。