國際原子能機構話北韓核設施有異動，希望北韓開放設施，等監察員檢查。其實北韓嘅舉動一直係國際焦點，雖然領導人金正恩今年同南韓總統文在寅會唔，雙方增加交流，令朝鮮半島出現一番新氣象，但回看幾年之前，雙方嘅關係仲係凍冰冰，更加發生過炮擊事件，造成人命傷亡。 

2010年11月23日，南韓於兩韓邊界嘅延坪島同附近海域展開軍演，有炮彈落入爭議水域，被北韓開炮攻擊，南韓發射80枚炮彈還擊。島上有唔少住宅被摧毀，升起濃濃黑煙，部份居民到地下避難所暫避或坐船逃命，事件中有兩個南韓士兵同兩個平民喪命。當時南韓緊急出動戰鬥機，並且提升至和平時期最高級別嘅警戒狀態，係朝鮮半島雙方自1953年停火之後最激烈嘅衝突之一。

雖然有部份媒體話北韓唔啱，但亦有專家講過，延坪島同周邊海域屬於兩韓爭議水域，北韓方面認為，按照三八線劃分，嗰海域應該屬於北韓，不過當時嗰範圍被美軍佔據，之後仲畀咗南韓，掀起爭議；而且北韓於對方演習前亦講明，一有炮彈落入相關海域就會出手，所以北韓並唔係無端端挑釁。咁究竟邊個啱邊個唔著？要留待大家自行判斷喇。

圖片嚟自網絡。