之前講開香港第一批女警，不如介紹多少少。其實舊時警隊有個規定都幾特別，原來份合約寫明女警入職時一定要係單身，三年內唔可以結婚，否則就要辭職。當年第一批女警原本有十個，有九個成功畢業，後嚟有一個被揭發已經結婚而遭革職，另外有兩個女警喺畢業三年內結婚而辭職，令到第一批女警畢業三年之後，只係得返六個。

過咗頭三年之後，女警就可以結婚，警隊仲會發放俗稱「嫁妝費」嘅特別津貼，每做夠一年就可以得到相當於一個月人工嘅津貼，如此類推，曾經有警花做咗七年先結婚，就足足拎咗七個月人工！另外，警隊曾經規定，女警唔可以同職級一樣嘅警員結婚，如果唔係就要辭職；後嚟再加強限制，就係如果兩個警察結婚，職級較低嗰個就要辭職。當年第一批女警之中，有位就係因為嫁咗俾歐籍督察而辭職。

「三年唔俾嫁」呢個規定，足足實行咗20多年，直到1972年先至廢除，而兩個警察結婚，低級嗰位要辭職呢個規定，之後亦不了了之。而之前提過香港第一位陀槍師姐十姐，佢喺警隊服務咗20年之後，因為要照顧仔女而辭職，最後第一批女警當中，只有林張淑華係由頭做到尾，去到1987年先退休。

用劇照借代女警。圖片嚟自網絡。