上網時手痕撳開電視劇《醉打金枝》嘅片段，估唔到一眨眼，套劇已經係超過二十年前嘅作品，睇兩睇真係好懷念歐陽震華同關詠荷依對螢幕情侶組合。講開《醉打金枝》，其實內容係以唐代名將郭子儀個仔郭曖同老婆昇平公主嘅軼事為原型，即刻同大家重溫段歷史吓先。

先講講兩位主人翁，男主角郭曖用現代講法表達，係官二代，而女主角昇平公主係唐代宗嘅皇帝女，兩個人嘅結合可以話係政治聯姻。話說兩個人結婚之後，有次嘈起上嚟，根據《資治通鑑》記載，郭曖當時爆咗句，「唔好恃住你爸爸係皇帝，我阿爸唔做天子之嘛」，暗示緊郭子儀想做皇帝嘅話，公主老竇唐代宗仲邊有碇企？

嘩！郭曖唔認低威不特止，仲膽敢以下犯上，公主嬲起上嚟，入宮同皇帝爸爸告狀。點知唐代宗勸返個女轉頭，「佢講得啱，如果郭子儀想做天子，天下仲點會屬於李家？」仲叫公主返去郭府添。

郭子儀知道件事後，分分鐘有得震無得瞓，即刻囚禁郭曖同向皇帝請罪，唐代宗就講咗句金句，「唔裝聾扮啞，做唔到長輩」，話兒女間嘅閨房之言唔可以當真。郭子儀返歸後，打咗郭曖幾十杖作為懲罰。而依段故事就成為劇目《醉打金枝》嘅藍本，成為影視作品嘅題材。

圖片嚟自網絡。